اک اک کرکے یاد پئے آون سجناں دے سبھ لارے
رات نوں سورج دیکھاں اکبر، دن نوں دیکھاں تارے
گُم سمّ کھڑھیاں میریاں سدھراں تیرا رستہ دیکھن
جگنواں وانگوں دین بھلیکھے ویلے دے لشکارے
چار چُفیرے جاگدیاں خواباں نے پہرہ لایا
رنگ برنگے، بے ترتیبے جذبے لین ہُلارے
یاد تری جد آوے دل چوں انج آوازاں آون
رات دے پچھلے پہرے جیوں کوئی کھوہ وچّ پتھر مارے
لہراں دیندیاں تیز ہواواں، بِٹّ بِٹّ پئیاں تَکّن
اُکھڑیاں اُکھڑیاں ساہواں اُتے لوکاں محل اُسارے
اُچے اُچے کوٹھیاں اُتے چھوٹے چھوٹے بندے
اِنج پئے جاپن، جیویں زمانے شیشے وچّ اتارے
جدوں اچانک راتاں ویلے چند چمکدا دیکھاں
اکبر میرے اندروں کوئی مینوں 'وازاں مارے
