عشق نشے وچ ڈولاں، میں تاں کجھ نہ بولاں اکھیاں مست نہ کھولاں، میں تاں کجھ نہ بولاں جاگ پئی تے ٹٹے جد سفنے مٹھے ڈر دیاں اکھ نہ کھولاں، میں تاں کجھ نہ بولاں دل وچ یار وسا کے بہہ گئے جندا لا کے کدی نہ جندے کھولاں، میں تاں کجھ نہ بولاں الفت دا چنگیاڑا پایا ہور پواڑہ دل دی راکھ نہ پھولاں، میں تاں کجھ نہ بولاں مار کے طعنے ٹوکاں ، دل ہے چھلیا لوکاں مونہہ اپنا نہ کھولاں، میں تاں کجھ نہ بولاں رُل گئی جندڑی میری، گھل گئی انج ہنیری ککھ گلیاں دے رولاں، میں تاں کجھ نہ بولاں امجد کنج سناواں، دل دا حال بھراواں کیویں دکھ میں پھولاں، میں تاں کجھ نہ بولاں
