میں گاون گاواں گی
ولائتوں پُتر آسی
اودھا سہرا سجاواں گی
۔۔۔
کوئی جازے اچ بہہ آیا
میں اوہدا راہ پئی تکاں
اوہ میم نوں لے آیا
۔۔۔
بنیرے تے کاں بولے
اساں ایر پورٹ جانا
میرا دل پیا کیوں ڈولے
۔۔۔
ہن رات ہنھیری آ
کوئی ڈیکدا ٹُر گیا ای
پچھے مٹی دی ڈھیری آ
۔۔۔
اکھ اتھرو دی بھر آسی
مسیتی تیل پاساں
جدوں ماہیا گھر آسی
۔۔۔
کیوں دکھاں نوں سہندے نے
گلّاں پردیسی دیاں
اتھرو ڈھل ڈھل پیندے نے
۔۔۔
کاواں رولا پایا ای
ساوا جہاز ویکھاں
جہڑا ولائتوں آیا ای
۔۔۔
تینوں یاد کریندی آ
ہر نیلے لفافے تے
ماں نفل پڑیندی آ
۔۔۔
کوئی تسلیاں دلاندا ریا
ماں پیو ڈیکن پئے
پُت پونڈ کماندا ریا
