چھوٹی عمرے دکھڑے وڈے ہوگئے نیں
بچے جمدیاں سار ای بڈھے ہوگئے نیں
عزت غیرت سبھ کجھ داء تے لا چھڈی
غرضاں ہتھوں لوکیں کملے ہو گئے نیں
سجن دشمن ،دشمن سجن کر لئے نی
تیرے لیکھ دے اکھر پٹھے ہو گئے نیں
دیوے دے نال یاری تاں ای لاندا نہیں
میرے اندر چانن انھے ہو گئے نیں
عشق بزارے حسن تماشہ آ لایا
کھلے کھلوتے بندےبردے ہو گئے نیں
ہن تے تیرے نال گلہ ایہہ بن دا اے
تیرے دکھ وی تیرے ورگے ہو گئے نیں
میں تےایویں بھکھ دا رونا رویا سی
سارے سجن سجےکھبے ہو گئے نیں
