ویلا نیڑے ڈُھکیا ڈاھڈا کَڑا کسے دا
ساڈے سِر تے پے نہ جاوے گَڑا کسے دا
کر جا تیرے ہتھوں بھلا جے ہوجاوے تے
رب وی خوش ہوندا جے پٹئیے اَڑا کسے دا
اک واری کوئی کارا کارکے بچ وی جائے
اوڑک اس دے سِر پے جاندا دَڑا کِسے دا
گھر دے رُوں دی نِگھ بگانی لگدی اے
اپنے لیف تے چاڑھ لئیے جے پَڑا کسے دا
میری تھاں اوہ پرہیا دے وِچ بول پیا سی
جنہیں اج تک کیتا نئیں سی دھڑا کسے دا
مانگویں پانی نال تریہہ کیہ لاہنی ارشد
کُھوہ کسے دا، لج کسے دی، گھڑا کسے دا
