روپ دا خمار ہووے، تیرا میرا پیار ہووے
گھڑا تیرے سر اُتے، نہراں تے دیدار ہووے
بُلھیاں تے سَک سوہنا، ول کھاندا لک سوہنا
چن جہے مکھڑے تے نِکا جیہا نک سوہنا
زلفاں دے بیلے اُتے، سوہنی جیہی بہار ہووے
باغاں وچ روز آویں، جوڑے وچ پُھل لاویں
ٹالھیاں دے اولھے اولھے دل دا قرار کھوویں
سسی سوہنی ہیر وچ تیرا وی شمار ہووے
چاواں دی ہوا چلے دلاں وچ پیار پلّے
تاریاں دی چھاویں چھاویں عاشقاں دی بلے بلے
پیار دی شراب والا چڑھدا خمار ہووے
میلیاں دی رُت آوے خوشیاں چ جند نہاوے
کُھسے نال سوہنا لاچا، میرے تن سج جاوے
روپ تیرا کُڑیاں دے ٹولے دا شنگھار ہووے
(2012)
حوالہ: عشق دا ورقہ پھول، گلشن ادب پبلی کیشنز لاہور؛ صفحہ 37 ( ویکھو )
