عرب دے چن توں جان واری
ہزار شاہاں دی شان واری
جہالتاں نوں دُور کیتا
کفر چکنا چور کیتا
جہان نور و نور کیتا
ہر ایک دل نوں طور کیتا
فتح دا ہر اک نشان واری
ظلمتاں دی ہار ہوئی
حق دی کشتی پار ہوئی
بُت پرستی بیکار ہوئی
دین و دنیا بہار ہوئی
ایسے محسن توں آن واری
ذرہ ذرہ کہہ رہیا اے
علم دا دریا بہہ رہیا اے
غرور قدماں چ ڈھہ رہیا اے
غم دا پانی لہہ رہیا اے
دو جہاناں دا مان واری
پیار اندر جہان رنگیا
کوئی نہ نفرت دے کول لنگھیا
گلے لگایا جس نے ڈنگیا
خزانہ ونڈیا جس نے منگیا
عظمتاں دا نشان واری
دشمناں نوں معاف کیتا
صبر دا ہر دم جام پیتا
بے کساں دا زخم سیتا
کسری قیصر زیر کیتا
فتح دا ہر اک میدان واری
جناں صحابہ دا خون بہایا
کلیجہ چبیا فلک ہلایا
دل دکھایا تے ستایا
بیکساں دا گھر جلایا
عام معافی دا دان، واری
(2012)
حوالہ: عشق دا ورقہ پھول، گلشن ادب پبلی کیشنز لاہور؛ صفحہ 18 ( ویکھو )
