تیرے خط پڑھ پڑھ کے رویا ساری رات میں
تیری یاد چ پل پل مویا ساری رات میں
نہیوں لتھے دل توں داغ وچھوڑے تیرے دے
بڑا ہنجوواں نال سی دھویا ساری رات میں
تیرے ہجر فراق دی اگ نوں ٹھنڈیاں کرن لئی
ہیسی کھوہ نیناں دا جویا ساری رات میں
ٹٹے شیشے وانگ دوبارہ جُڑ نہ سکیا واں
ایسا کرچی کرچی ہویا ساری رات میں
ہاواں سُن کے فلک دیاں توں خورے آ جاویں
بوہا گھر دا نہیوں ڈھویا ساری رات میں
حوالہ: سوچاں دی بُکل، صفحہ 35 ( ویکھو )
