جیکر ساڈے سجن بیلی آل دوالے ہُندے
غیراں دے پھر سجناں سانوں کاہدے پالے ہُندے
انھیاں راتاں دے وچ یارو ٹھیڈے کدی نا کھاندے
جیکر لوکاں گلیاں دے وچ دیوے بالے ہُندے
جہڑے لوکی انّ غریباں کولوں کھوہ کے کھاون
اوہ لوکی نے خورے رانی خاں دے سالے ہُندے
لبھّ لیندا میں اوہنوں جے اوہ آپنی تھاں تے ہندا
بھاویں رستے دے وچ جِنے مرضی کھالے ہندے
کی سی سجنا جے کر ہندا میں تیرا پرچھاواں
جدھر جاندوں اسیں وی تیرے نالے نالے ہندے
جے کر میں وی نیچاں دے نال یاری لائی ہندی
ہاسیاں دی تھاں میریاں بُلھاں تے وی نالے ہندے
نگھیاں راتاں دی جے اوہنے قدر پچھانی ہندی
کاہنوں اوہدیاں لیکھاں دے وچ اینے پالے ہندے
پیڑ پرائی نوں جو لوکی آپنی ہکّ تے زردے
اوہ ہی لوکی ارشد دُکھاں درداں والے ہندے
