کدی جے اوس دے مکھڑے توں پردا سرکیا ہندا
میری اکھیاں دا شیشہ پھیر کیوں نہ تڑکیا ہندا
اوہدے لنگھن دی خوشبو اس طراں آؤندی فضاواں چوں
عطر جیویں کسے نے راہ وچ ہے چھڑکیا ہندا
توں مرمر سنگ دی ساری ملائمی بھلّ جانی سی
کدی جے یار میرا توں وی ماہیا دیکھیا ہندا
توں شر دا بیج بیجن والیا میری زمین اُتے
توں جمن توں ہی پہلاں کی سی جیکر مر گیا ہندا
کدی منزل نہیں ہندی نصیباں اوہدیاں اندر
جو بندا آپ آپنے پیر توں ہے تھڑکیا ہندا
اوہدے مکھڑے دی لالی اس طراں دندی وکھائی اے
جویں شعلا کوئی اے طور اُتے بھڑکیا ہندا
تیرے لئی کھولھ چھڈنے سن اونھے سبھ آپنے دروازے
توں گھنگرو بن کے در تے جے اس دے تھرکیا ہندا
میرے من دی پیاسی دھرت نے سیراب ہونا سی
تیرے اندر جے بدل پیار والا کڑکیا ہندا
میں ایویں تے نہیں اس ذات تے ایمان لے آندا
جے توں وی ویکھ لیندا اوس نوں تے پھڑکیا ہندا
ادا مکھن جیہا مکھڑا تیرے لیکھاں چ ہونا سی
کدی ارشد جے اوہنوں وانگ ددھّ دے رڑکیا ہندا
