ویلے دے اوتارا ایہہ کی کیتا ای
ٹھیک نہیں ورتارا ایہہ کی کیتا ای
دھرتی اتے آکے تیرے نائب نے
ویکھ تے سئی کرتارا ایہہ کی کیتا ای
اگّ نفرت تے خون دی مورت لیکی اے
واہ واہ وے فنکارا ایہہ کی کیتا ای
وچھڑے ہوئے سجن میریاں ہاکاں تے
دتا نا پرتارا ایہہ کی کیتا ای
کی ہویا سی تینوں ویلے ہجرت دے
نال نہ ٹریوں یارا ایہہ کی کیتا ای
میں جس کھوہ وچ پیار دی مِسری گھولی سی
توں کر چھڈیا کھارا ایہہ کی کیتا ای
بدلیا نہ توں لَکھّ واری سمجھایا میں
آپنی سوچ دا دھارا ایہہ کی کیتا ای
اؤکھا ویلا میرے تے جد آیا تے
کر لیا یار کنارا ایہہ کی کیتا ای
