جی کردا اے میرا میں وی اوہدا منکا بھنّا
جیہنے رانجھو یار توں کھوہ لیا چوری والا چھنّا
دُکھاں باجھوں اِس دنیاں وچ آ کے کجھ نہیں کھٹیا
اِنج گزاری یار حیاتی جیوں بیلن وچ گنا
مینوں پھیر وی ڈر آؤندا اے پٹواری دے کولوں
نا سی میری پیلی کوئی تے نا ہے سی بنّا
ورھیاں توں گلّ لمی ہوئی نوں اک پاسے لا دے
یا رکھّ لے یا چھڈ دے مینوں کردے ہنّا بنّا
بندے چھڈّ کے لا لئے اوہنے رچھاں نال یارانے
لگدے مینوں ہو گیا ہونے اوہ اکھیاں توں انّھا
تیری فطرت کمّ چنگے تے وی تنقید ہے کرنا
لگدے مینوں باز نہیں آؤنا توں کُتے دیا کنّا
لوکاں چنّ افلاکی تکّ کے آپنی عید منائی
میں وی عید مناواں آپنی چڑھ کوٹھے تے چنّا
کہڑے مان تران دے نال میں تیری ہکّ نال لگاں
نا میں لال جواہر کوئی نا میں کوئی پنا
اوہ آپنی مرضی دا مالک میری گلّ نہیں مندا
پتھر دے نال کاہنوں ارشد آپنا متھڑا بھنّا
