فخر تیری غلامی تے ہزاراں بادشاہوں دا
جیہناں نوں تانگھ آقا دی سلام اوہناں نگاہواں دا
جیہڑی دھرتی قدم چُمے جتھوں اک وار لنگھے او
میں منگتا اوہناں گلیاں دا سلامی اوہناں راہواں دا
بھری اے دھرتیاں جھولی، ورہے موتی مدینے دے
خزانے جو لُٹا رہیاں سلام اوہناں گھٹاواں دا
نہ رتی فخر، ماسا مان نہیں، اک تانگھ اے سائیاں
محمد مصطفےﷺ لج پال اے ہوکے تے ہاواں دا
ہے سدھر سک دا دارُو، نگاہ تیری، کرم تیرا
عرب دا شہنشاہ مولا، حسؔن جیہے بے صداواں دا
حوالہ: نیتی عشق نماز، حسن ملک؛ سانجھ لاہور 2009؛ صفحہ 15 ( ویکھو )
