محمدﷺ رحمۃ للعالمین دا فیض اے جاری

محمدﷺ رحمت اللعالمین دا فیض اے جاری
میں اوہدے خُلق دے قربان دُنیا موہ لئی ساری

خلقت نعت خواں اے، پتھراں کلمے پڑھے تیرے
تویتاں دل دیاں اندر اساں ناویں مڑھے تیرے

تیرے فیضان دے چشمے چوں جہناں گُھٹ وی پیتا
اوہناں دی سَور گئی قسمت اوہناں تے کرم رب کیتا

فلک دے تاریاں سکھیا تیری مسکان توں ہسنا
تیری جُود و سخا توں سکھیا ابرِ کرم وسنا

ایہہ فیض اے کملی والے دا جو ہوئی روشنی جگ وچ
تجلی تیری ای تکی سی ابراہیمؑ نے اگ وچ

بھلا دسو کھاں ایدوں ودھ کیہ معجز نمائی اے
کہ اُس اُمی نبی دی والہ و شیدا خدائی اے

کدورت چھڈ کے، پیاریاں دے سُچے گیت گاون لئی
محبت تے وفا دے سِدھے رستے اُتے پاون لئی

درماندہ، دُکھی، تے ماڑا، کوئی نجدی، کوئی حبشی
لوکائی دی گئی عظمت نوں مُڑ واپس دواون لئی

ایہہ کہہ کے انی اکملت سنہیا جانفزا دتا
کتاب نور دتی جگ نوں نور الہدی دتا

غریباں جَس گائے واہ، اوہ سوہنا نبی آیا
قرآن اندر خدا نے جس دے بارے آپ فرمایا

سورج، چن صدقے اوہ مکرم اوہ عظیم آیا
ازل دیاں کُٹھیاں روحاں لئی ارفع حکیم آیا

حسؔن دی اکھ نوں دے نور تے راہواں نوں چانن دے
جو ساہواں باقی نیں روضے دی چھاں ہیٹھاں ہنڈاون دے