ہولی ہولی عمر گزر دی جاندی اے
بند مٹھی توں ریت کھلر دی جان دی اے
اک اک ساہ حیاتی دا اے سرمایہ
قطرہ قطرہ گاگر بھر دی جاندی اے
تیرے باجھ سویر دی اکھ اچ اتھرو نیں
شام وی لمے ہوکے بھر دی جاندی اے
انیاں تیز اے خنجر درد وچھوڑے دا
لوں لوں دے وچ نوک اُتردی جاندی اے
جند نمانی روگ اولے لا بیٹھی
چھاں اچ سڑدی دھپ اچ ٹھردی جاندی اے
ہیر نوں وس نہ پاؤ ڈاہڈے کھیڑیاں دے
ترلے پاندی منتاں کردی جاندی اے
جدوں دی دل دے اُتے غم دی تریل پئی
ایہدی صورت ہور نکھر دی جاندی اے
پردیساں وچ رہ کے اپنے دیساں دی
ہُن تاں اک اک شکل وسر دی جاندی اے
کسے نوں پکے پتناں توں وی خوف آوے
کوئی کچے گھڑے تے تردی جاندی اے
کیہ کہیے اس دنیا بےاعتباری نوں
کرکے اک اک گل مُکردی جاندی اے
سحر جی اینے مگن او کہڑیاں سوچاں وچ
پیالی اندر چاہ وی ٹھردی جاندی اے
