نہ اڑیا تُوں ملیا نہ کر

نہ اڑیا تُوں ملیا نہ کر
فیر ہجر ہنڈاؤنا پیندا
وختاں دا ساڈا چِھڑیا چِینا
آپ کھنڈاؤنا پیندا
نہ اڑیا تُوں ملیا نہ کر

تُوں آویں یاداں دے پنچھی
اُڈ پُھلاہیں بہندے
ہاڑے کڈھاں ترلے پاواں
فیر نہ پنجرے پیندے
پنجرے پاؤن دی خاطر اڑیا
کیہہ نہیں کرنا پیندا؟
دل دا ماس تلی تے دھر کے
آپ کھوانا پیندا
نہ اڑیا توں ملیا نہ کر

توں آویں تے ہس پیندے ہاں
روندیاں بالاں وانگوں
گئے سمے نُوں سانبھنا پیندا
کُھلیاں والاں وانگوں
تیرے جان دے بعدوں سانوں
جِینا مرنا پَینّدا
نہ اڑیا تُوں ملیا نہ کر

تُوں آویں تے ودھ جاندی اے
میرے دِل دی دھڑکن
سَدھراں دی ہانڈی وِچ دالاں
تینوں ویکھ کے بھڑکن
بِرہا دی اگ ساڑے ہانڈی
انگ چھہانا پیندا
نہ اڑیا توں ملیا نہ کر

تُوں آویں چاواں دِیاں ولّاں
کندھوں پلم کھلوون
آساں والے سنبل رُکھ تَوں
پُھٹیاں اُڈ چلوون
تُوں جاویں تے لارے لا لا
من پر چاوَنا پیندا
نہ اڑیا توں ملیا نہ کر

تُوں آویں تے سبھ کُجھ جر لاں
پر جان نہ جریا جاوے
کول بہویں تے لجاں آون
دُوری مُول نہ بھاوے
ایسے پاروں مِنتاں کر کر
ایہہ سمجھاؤنا پیندا
نہ اڑیا توں ملیا نہ کر

نہ اڑیا تُوں ملیا نہ کر
فیر ہجر ہنڈاؤنا پیندا
وختاں دا ساڈا چِھڑیا چِینا
آپ کھنڈاؤنا پیندا
نہ اڑیا تُوں ملیا نہ کر