اج وی میرے نال کوئی میرے
وچوں لڑن لئی آیا
تھوڑی دیر ہوئی اے اوہنوں
کِنا ای میں سمجھایا
اج وی ہور جہان دے منظر
ایس جہاں وچ دِسن
اج وی ہور کسے دے پھٹ ای
میرے اندر رِسن
اج وی مینوں کل دے وانگوں
آندی کل دی پے گئی
اج وی جیہڑی کل کرنی سی
پچھلی کل وانگ رہ گئی
اج وی میری اکھ وچ ڈُبے
چن تے رہ گیا ہنھیرا
اج وی میرے ساہ نوں پا لیا
تیرے ساہ نے گھیرا
اج وی میری نظم نے مینوں
اندروں طعنہ دِتا
اج وی اوہدی گل تے بہتا
غصہ میں نہ کیتا
اج وی اپنے آپ توں زہر
اُدھارا لے کے پیتا
اج وی میری اکھ تے
میریاں پلکاں ماتم کیتا
اج وی اپنے آپ نوں اپنے
کولوں آپ لُکایا
اج وی اپنی آپ نوں لبھیا
اپنے آپ نوں پایا
اج وی میرے نال کوئی میرے
وچوں لڑن لئی آیا
حوالہ: میں چیتر نہیں چکھیا؛ سانجھ؛ صفحہ 87