گلّ کدے نہ آکھ سکی میں، بُلھاں اُتے آئی ہوئی

گلّ کدے نہ آکھ سکی میں، بُلھاں اُتے آئی ہوئی
چن سورج توں لُکدی پھردی، واواں توں گھبرائی ہوئی

کوئی بُوہا کُھلھیا ناہیں مینوں دیکھ کے لوکیں لُکدے
کدھر جاواں ؟ سوچ رہی آں، بند گلی وچّ آئی ہوئی

وا دی پینگھ تے پتے وانگوں، ایدھر اودھر جھوٹے کھاواں
نہ کوئی میرا بابل ایتھے، نہ کوئی میری مائی ہوئی

دریا وی صحرا بن جاندے، میرے کولوں لنگھدے لنگھدے
نھیرے دے وچّ لُک جاندی اے، رُتّ رنگیلی چھائی ہوئی

دُکھ ودھ کے گھٹّ ہو جاندے نے، رات ہنھیری لنگھدی ناہیں
روز ای ڈگے بجلی گھر تے، مڑیؤں دل نوں لائی ہوئی

کالی گھٹ چھاوے نہ چھاوے، دن ہووے یا شاماں ہوون
چن چمکے یا سورج، خاور تیرے کد رشنائی ہوئی ؟