نھیرے مینوں گھیرے پائے، دُکھاں لائے ڈیرے نے
جھولے وانگوں ڈولن دیکھو، بھاگ اولّے میرے نے
سترنگیاں برساتاں آئیاں، یاداں دی برسات سنے
ایپر بھامبڑ مچدے دیکھو، میرے چار چپھیرے نے
رات ہنھیری کس بنھ دتی، چن وی نظریں آوے نہ
ہتھ نوں ہتھ نہ دسدا پھر وی، لوکی کہن سویرے نے
مینوں نہ کوئی رستہ دسدا، منزل تیکر جاون دا
چوک دے وچّ کھلوتی ہوئی آں، رستے چار چپھیرے نے
اوہدیاں سبھے گلاں باتاں، ہن میں خوب پچھان گئی
گرگٹ نے کی رنگ بدلنیں، اوہدے رنگ ودھیرے نے
انج تے ہے اسمان ایہہ سارا، خاور بھریا تاریاں دا
اپنی قسمت اُتے پھیر وی، چھائے گھپّ ہنھیرے نے
