سیتے ہوٹھ میں عمراں والے کھولھاں جاں نہ کھولھاں ؟
اج تیکر نئیں بولی ہن وی بولاں جاں نہ بولاں ؟
ڈردی، کمبدی، جھکدی میں تاں ساری عمر گزاری
ہن وی سوچ رہی ہاں دُکھڑے پھولاں جاں نہ پھولاں ؟
جھوٹھ، فریب، مکر دے پردے اج سارے میں پاڑاں
سبھ مکاری پیراں ہیٹھاں رولاں جاں نہ رولاں ؟
چُپ دی سُولی اُتے میں تاں کئی صدیاں دی ٹنگی
چپ دے جِندرے توڑاں مونہوں بولاں جاں نہ بولاں ؟
جِندڑی دے اس مصر بزارے اک روٹی دے سھاویں
دل دا یوسف ریت دی تکڑی تولاں جاں نہ تولاں ؟
اپنے پچھوں آون والیاں تائیں کنج بچاواں
ویریاں واسطے خاور موہرا گھولاں جاں نہ گھولاں ؟
