لیکھا

نیندر سفنے راہیں ٹر دی
میرے موڈھے تے سِر رکھ کے
سنجے نینیں آن سمائی

ات بھلیکھا
نیندر تے سفنے چوں پہلاں
کیہڑا اکھیاں ول آیا سی
یاں اکھیاں نے
دوویں پاسے
اکو واری
ویکھے سن
جگراتے دا سلھڑا بُوٹا
ہیٹھاں جس دے پرچھاویں دے
نیندر دے آون توں پہلاں
سوچاں لے کے بیٹھے ساں

سوچ نے اپنے جثے اُتے
آساں والا چولا پایا
دل زخمایا
کئی ورھیاں توں جاگن والا
خاباں راہیں
دل دا دیوا بالن آیا
روح دا لیکھا تارن آیا