ماں ( ہائیکو)

پُھل کلیاں توں ودھ سوہنی
ماں جیہی مٹھی ہستی
دُوجی جگ وچ نہیں ہونی

بیلے وچ کاں بولے
رل کے دعا منگو
میرے ویڑھے وچ ماں بولے

جیہدی شکل چ رب لبھدا
ماں دیاں پیراں تھلے
مزہ جنتاں دا سبھ لبھدا

اوہناں بالاں توں جان صدقے
جیہناں دی اے ماں جیوندی
جیہڑی کہندی اے ماں صدقے

جیہناں بالاں دی ماں نہیں ہوندی
دُھپاں وچ اوہ بلدے
سِر اوہناں دے چھاں نہیں ہوندی

رب اوہناں دا رُس جاندا
جیہناں دی ماں رُسدی
سبھ اوہناں توں کُھس جاندا

پُھل سجرے گلاب والے
ماں نال ہس بولو
مٹھے جملے ثواب والے

جھکڑاں وچ رُل جاندا
بندہ اوہ بد بختا
جیہڑا ماں نوں بُھل جاندا

بخشش دا پج ہوندا
ماں نوں تکو پیار دے نال
مکے گئیاں نہیں جے حج ہوندا

دس دیندی اصول سارے
ماں جو کجھ دسدی
نہیں دسدے سکول سارے

ماں عرش ہلا دیندی
زہر بھرے پُتراں نوں
جدوں جین دی دعا دیندی

ماں اکھیاں دا نور سجنو
سدا رہو ماواں کول
کدے جاؤ نہ دُور سجنو

پانی باغ نوں مالی دیوے
پُتر نکمیاں نوں
ماں بھر بھر تھالی دیوے

ماواں صبر دا گہنا اے
ایہناں نال لڑیا نہ کر
ایہناں سدا نہیں رہنا اے

رب آکھیا موسی نوں
تیرے پِچھے ماں نہیں رہی
ہُن سنبھل کے آویں توں

وکھ ایہدیاں باتاں نیں
رب دی سونہہ ماواں جگ تے
انمول سوغاتاں نیں

پُت مان نیں ماواں دے
ماں جدوں پُت جمدی
نِت لاڈ ویکھو چاواں دے

ماں صبر دا گہنا اے
ایتھوں جیہڑا دُور ہویا
اوہنے سُکھی نہیں رہنا اے

باغاں وچ پُھل کِھلدے
بختاں والے اوہ لوک
جیہڑے ماواں نوں روز مِلدے

جیہڑے ماواں دے دکھ ونڈ دے
غم اوہناں بالاں کولوں
کوسوں پرے ہو ہو لنگھدے

ایس گل دا خیال رکھنا
حج دا ثواب لبھدا
ماں نوں پیار دے نال تکنا

ربا ماں دا مان رکھیں
جگ وچ ایہناں دی
اُچی سبھ توں شان رکھیں

ماں اکھیاں دا تارا اے
ایہدے نالوں سوہنا جگ تے
نہیں اک وی نظارا اے