میرا رب

کیہ ہویا جے میتھوں میرا رب رُسیا
آندے منان دے طریقے ہزار مینوں

ستر ماواں توں ودھ کے اوہ چاہندا اے
جیہنے نُطفے چوں کیتا شاہکار مینوں

میرے آلے دوالے فرشتے چھڈ کے
رکھیا دوہاں دے ادھ وچکار مینوں

بھار پاپ دا چُک کے وی ٹُری جاناں
کجھ وی آکھدے ناہیں قلم کار مینوں

توبہ جد وی میں اندروں کر چھڈی
اوہنے لکھن نہیں دِتا گنہگار مینوں

واری جاواں میں رب دیاں شاناں اُتوں
اوہنے سینے نال لایا کئی وار مینوں

میرے عمل اعمال سبھ سیاہ نامہ
اوہ تے تد وی نہ آکھے بدکار مینوں

گہنگار نوں لوک نہیں جین دیندے
اوہنے دِتی اے کُھلی مہار مینوں

رج کھا کے میں شکر وی نہیں کردا
اوہ تے دیندا اے نِت رزگار مینوں

بندے ہتھ جے ہو جاندی روزی میری
اوہ تے کر دیندا روز خوار مینوں

میرے بال وی روز ای بُھکھے سوندے
جیکر روزی نہ دیندا غفار مینوں

نیت جیہڑی وی لے کے اوہدے در جاواں
کدے پچھدا نہیں وچ بزار مینوں

میرا رُتبہ اے ودھ فرشتیاں توں
چڑھیا رہندا اے ایہو خمار مینوں