جاں سبھ کم رہیا ہو پکّا، کیتی شاہ تیاری
سیف ملُوک ماؤُ تھیں رُخصت ،لیندا چھیکڑواری
جاء گھراں وِچ کول ماؤُ دِے، بدّھے ہتھ کھلوندا
نالے آکھے رُخصت دیؤ ،نالے ہنجُوں روندا
ماؤُ بال ڈِٹّھا تن لِسّا،جیؤں بیمار چروکا
چؤدھوِیں دِے چن جیہا چہرہ، ہویا چن اجوکا
پُھل بہاری جیہی پوشاکی، میلی ہوئی غُباروں
شیشے وانگ جُثّہ سی جیہڑا، کالا ہویا زنگاروں
لال مثال جمال پُتّر دا، آہا کمال انگاروں
کولے وانگ ہویا تن لُوٹھا، لنب عِشق دِی ناروں
دُرخُوشاب بے آب دسیوے ،ڈالی گل پر کالے
نرگس نین مریض روون تھیں، داغ لگّا گُل لالے
سرُو آزاد بُلند سُفیدا، نِیلا چوہ چوہ کردا
کیسی واء خزاں دِی لّگی، ہو گیا رنگ زردہ
