انبی دے بوٹے تھلے

اِک بُوٹا اَنبی دا،
گھر ساڈے لگا نی
جس تھلّے بہنا نی،
سُرگاں وچّ رہنا نی،
کی اِسدا کہنا نی،
ویہڑے دا گہنہ نی،
پر ماہی باجھوں نی،
پردیسی باجھوں نی،
ایہہ مینوں وڈھدا اے،
تے کھٹا لگدا اے

اس بُوٹے تھلے جے،
میں چرخی ڈاہنی آں،
تے جی پرچاون نوں،
دو تنداں پانی آں،
کوئل دیاں کوکاں نی،
مارن بندوقاں نی،
پِیہڑے نوں بھنّاں میں،
چرخی نوں پُھوکاں نی

پھیر ڈردی بھابو توں،
لے بہاں قصیدہ جے
یاداں وچ ڈُبی دا،
دل کدھرے جُڑ جاوے،
تے سُوئی قصیدے دی،
پَوٹے وچ پڑ جاوے
پھیر اٹھ کے پِیہڑے توں
میں بُھنجے بہہ جاواں،
چِیچی دھر ٹھوڈی 'تے
وہناں وچ وہِ جاواں
سُکھاں دیاں گلاں نی،
مَیلاں دیاں گھڑیاں نی،
کھیراں تے پوڑے نی،
ساون دیاں جھڑیاں نی،
سوہنے دے ترلے نی،
تے میریاں اَڑیاں نی،
جاں چیتے آ جاون،
لوہڑا ہی پا جاون

اوہ کیہا دہاڑا سی ؟
اوہ بھاگاں والا سی،
اوہ کرماں والا سی،
جس شبھ دہاڑے نی،
گھر میرا لاڑا سی

میں نہاتی دھوتی نی،
میں وال ودھائے نی،
میں کجلا پایا نی،
میں گہنے لائے نی،
مل مل کے کھوڑی میں،
ہیرے لشکائے نی،
لا لا کے بِندیاں میں،
کئی پھند بنائے نی
جاں ہار شنگاراں توں،
میں وہلی ہوئی نی،
آ انبی تھلے میں،
پھر دھونی چھوہی نی

اوہ چند پیارا وی،
آ بیٹھا ساہویں نی،
انبی دی چھاویں نی
اوہ میریاں پریتاں دا،
سوہنا ونجارا نی
قصے پردیساں دے،
لاماں دیاں گلّاں نی،
گُھمکار جہازاں دی،
ساگر دیاں چھلّاں نی،
ویری دے ہلّے نی،
سوہنے دیاں ٹھلّھاں نی،
اوہ دسّی جاوے تے،
میں بھراں ہُنگارا نی

اس گلاّں کردے نوں
پتیاں دی کھڑ کھڑ نے،
بدلاں دی شُوکر نے،
ونگاں دی چھنّ چھنّ نے،
چرخی دی گُھوکر نے،
ٹپیاں دی لوری نے،
کوئل دی کُوکر نے،
منجے تے پا دتا،
تے گُھوک سلا دتا

تکّ ستا ماہی نی،
چرخی دی چرمکھ توں،
میں کالک لاہی نی،
جا ستّے سوہنے دے،
متّھے تے لائی نی
میں کُھلھ کے ہسی نی،
میں تاڑی لائی نی
میں دوہری ہو گئی نی،
میں چوہری ہو گئی نی،
اوہ اُٹھ کھلویا نی،
گھبرایا ہویا نی
اوہ بِٹ بِٹ تکے نی،
میں کھڑ کھڑ ہسّاں نی،
اوہ مڑ مڑ پُچھے نی،
میں گلّ نہ دسّاں نی

تکّ شیشہ چرخی دا،
اس گُھوری پائی نی،
میں چُنگی لائی نی،
اوہ پِچھے بھجّا نی،
میں دیاں نہ ڈاہی نی،
اس مان جوانی دا،
میں ہٹھّ زنانی دا،
میں اگّے اگّے نی،
اوہ پِچھے پِچھے نی،
منجی دے گِردے نی،
نسدے وی جائیے نی،
انبی دے گردے نی،
ہسّدے وی جائیے نی،
اوہدی چادر کھڑکے نی،
میری کوٹھی دھڑکے نی،
اوہدی جُتّی چیکے نی،
میری جھانجر چھنکے نی،
اوہدی پگڑی ڈھیہہ پئی نی،
میری چُنّی لہہ گئی نی،
جاں ہپھ کے رہِ گئے نی،
منجی تے بہہ گئے نی

اوہ کیہا دہاڑا سی ؟
اوہ بھاگاں والا سی،
اوہ کرماں والا سی،
جس شبھ دہاڑے نی،
گھر میرا لاڑا سی

اج کھان ہواواں نی،
اج ساڑن چھاواں نی،
ترکھان سداواں نی،
انبی کٹواواں نی،
طوبیٰ میں بھلی نی،
ہاڑا میں بھلی نی
جے انبی کٹّاں گی
چڑھ کس دے اُتّے،
راہ ڈھولے دا تکاں گی ؟