رشوت

اک بندے نے اک واری مینوں پانی گُھٹ پیایا
پانی پیا کے اُسے ویلے سوال اہنے اک پایا

کم اوہ بے انصافی دا سی میں اوہ کم نہ کیتا
فیر خیال اوہ مڑ مُڑ آوے کیوں پانی میں پیتا

اُنہے اندر جا کے بیوی نوں ایہہ گل چا دسی
اوہ گل سُن کے ویہڑے اندر کھڑ کھڑ کرکے ہسی

فیر گُلے نوں آکھن لگی ہور پیا انہوں پانی
شُکر خدا دا اُس ویلے میں پا نہیں دِتی لسّی

میں وی سُن لی گل اُنہاں دی جیڑی انہاں نے کیتی
کچھ نہ پُچھو پانی پی کے کی میرے تے بیتی

عورت خاوند نوں پئی آکھے جے ایہہ مُڑ کے آیا
مُڑ کے اِس کمینے نوں توں پانی فیر پیایا

آپے کت لئیں سوتر سارا تے آپے لا لئیں چھلی
اپنے پیو دے گھر وچ مُڑ کے میں جاواں گی چلی

اُس عورت دیاں گلاں سُن کے مینوں راہ نہ آوے
خالد اُس گھٹ پانی اندر ڈُب ڈُب مردا جاوے

میں فیر پوری کوشش کیتی پانی باہر نہ آوے
ایسی عورت یارب کِسے مرد دے وس نہ پاوے

میں اپنے انصاف دا پکا انہوں پانی پیارا
اکو گل توں پے جاندا اے اندر دا لشکارا

ایسیاں ماواں دیاں اولاداں بہہ گئیاں راہواں اُتے
گل اولاداں دی اے خالد مکے مانواں اُتے

محمد صاحب دی ایس گل نوں سچا کہے ہر کوئی
میرے نال قدم قدم تے ایہہ گل پوری ہوئی

نیچاں دی اشنائی کولوں فیض کِسے نہیں پایا
ککر اُتے انگور چڑھایا تے ہر خوشہ زخمایا