مکھی چوس چوہدری

اج اک چوہدری دی گل توانوں دسئیے
سُن کے تے سارے رل مل کے تے ہسئیے

پُچھو نہ ایہہ چوہدری دا کیڈا اوہ کنجوس سی
دنیا تے سچ مچ دا اوہ مکھی چوس سی

گھر اوہدے بی بی اوہدی کالی جئی موٹی جئی
نخرا تے ڈھیر سی اوہ قد دی وی چھوٹی جئی

دند اوہدے وڈے وڈے اکھاں دونویں چھوٹیاں
پیر چوڑے اِنج جیویں باجرے دیاں روٹیاں

اک اک کن وچ سو سو موریاں
منہ سر اِنج لگے چٹو وٹا دوریاں

ایہو جیہی بیوی ہووے پیسہ وی نہیں لگدا
رُکھی سُکھی کھا لئے بچاوا گھر اگ دا

چوہدری دا نوکر اک راتیں کِدے جاندا سی
لالٹین ہتھ وچ دیر نال آندا سی

چوہدری پُچھیا توں راتیں کتھ جاناں ایں
نالے لالٹین وچ تیل وی جلاناں ایں

تیل وی جلاناں ایں تے جُتی وی گھساناں ایں
سچی گل دھس روز کتھ پھیرے پاناں ایں

کہن لگا چوہدری جی سہیلی کول جاندا سی
اج توڑی گل ایہہ تواڈے کول چھپاندا سی

اج تُسیں پُچھیا تے سچی گل کرناں آں
اپنی وی منشا تواڈے اگے دھرناں آں

میرا جی اے میں ہُن شادی کدے کر لاں
سوہنی جئی دیکھ کے تے گھر بُوہا بھر لاں

سُن کے تے چوہدری نوں اگ جیویں لگ گئی
کہن لگا جھلیا ایہہ مار تینوں وگ گئی

میں وی شادی کیتی سی تے میں وی روز جاندا ساں
اندھیرے وچ جاندا ساں اندھیرے وچ آندا ساں

تیل وی بچاندا ساں تے ننگے پیر جاندا ساں
گٹے پیر پجدے تے ٹھوکراں وی کھاندا ساں