دُدھ وِچّوں اُڈ گئی چِٹیائی
چٹنی وِچّوں کَھٹیائی
لونگاں دے لِشکارے مُکّے
وَنگاں دی چھنکار
تے اُچیاں شملیاں دی وَڈیائی
یاداں وِچّوں چیتے بُھل گئے
چیتیاں وِچّوں صُورت شکل
تے اَکّھیاں چوں اَشنائی
گَلّاں باتاں گئیاں
باتاں وِچّوں معنی مطلب
قلماں چوں رُشنائی
معاف کریں
میرے جُھوٹھے موہنوں نِکل گئی سچّیائی
ایہہ گَل کَھبّی تے اوہ گل سَجّی
سِگرٹ دس روپے دی ڈبّی
کھوتے کوہن قصائی
اندر بُوٹی مُشک مچایا
جاں پُھلّن پر آئی
”جِیوے جِیوے پاکستان“
تے
”سوہنی دھرتی اللہ رکھے“
واہ واہ طرز بنائی
رنگ برنگے لوکی آئے
وَنّ سَوّنیاں ناراں
باہر قطاراں دے وِچ کاراں
اندر خلق خُدائی
اِک گَل میری پَلّے بَنھ لو
کہن لگا حلوائی
مکھیاں وی مُک جان گِیاں
جَدّوں مُکّی مٹھیائی
