ایس دنیا وچ ہر کم اپنے ہتھیں کرنا پیندا اے
آپے جیونا پیندا تے آپے مرنا پیندا اے
ورھے گواچے اس رستے توں کوئی آندا جاندا نئیں
فیر وی دیوا بال کے بنے اُتے دھرنا پیندا اے
انج لگدا اے گھراں دے اندر جیوں لوکی مر گئے نیں
ہر بوہے تے جا کے وا نوں ہوکا بھرنا پیندا اے
اک حرف لئی لکھاں ورقے لہو وچ رنگنے پیندے نیں
اک جنم لئی لکھاں واری جیونا مرنا پیندا اے
ایتھے لوکی اپنے ڈھڈ نوں سر تے چکی پھردے نیں
کم کرن نوں جی نئیں کردا فیر وی کرنا پیندا اے
پتھر دیاں مکاناں اندر چوراں وانگوں لُک لُک کے
گلیاں وچوں لنگھدی ہوئی چاپ توں ڈرنا پیندا اے
حوالہ: زیتون دی پتی؛ صفحہ 131