دل وچ کدی وی میل نہ رکھنی، صاف تے سُچیاں گلاں کرنا

دل وچ کدی وی میل نہ رکھنی، صاف تے سُچیاں گلاں کرنا
پِنڈ دیاں لوکاں دے وچ رہنا، سِدھیاں سِدھیاں گلاں کرنا

خورے کتھو سِکھ آیا وے، عادت یار منانے دی
رُس جاون دے بھانے منگنا، جھلِیاں جھلِیاں گلاں کرنا

یاد کرو تے ہاسا آوندا اے ، پہلے پہلے عشقے تے
گل گل دے وچ تِھڑ تِھڑ جانا، اَدھیِاں اَدھیِاں گلاں کرنا

سِر تے لکھ مصیبت چُک کے، جا بوہڑی دے تلے بہنا
پیٹو بھکھیاں رج رج ہسنا، اُچیاں لَمِیاں گلاں کرنا

ڈاہڈی بھیڑی عادت پئی اے ایس وسیبے لوکاں نوں
آپنے آپ دے وَل نہ تکنا، بَہہ کے جگ دِیاں گلاں کرنا

پَیریں سُکھ دی جُتی پونی، گلیاں دے وچ سمھ کے ٹُرنا
ہر کِسے نوں ہس کے ملنا، مِٹھیاں مِٹھیاں گلاں کرنا

آون والے ویلے کولوں، اُنجے ڈریا ڈریا رہنا
اُنجے بُجھیا بُجھیا رہنا، ڈھٹھیاں ڈھٹھیاں گلاں کرنا

قابل سائیں! جگ دے کولوں، تیرا دُکھ کُئی وکھرا نئیں
ایہ کیہ مُڑ مُڑ حُقہ پینا، بَلدِیاں بَھکھدِیاں گلاں کرنا