کِنج لنگھیا اے پچھلا سال، دسیں اوہنوں
ویکھ لیا ای ساڈا حال، دسیں اوہنوں
اوہدے برف سلوک نے یار، اگ ای لائی
سدھراں دے کھوہ پین اُبال، دسیں اوہنوں
اوس کشیدے واہے جو، دل اُتّے نیں
کول اے میرے اجے رُمال، دسیں اوہنوں
اُچی ماڑی آساں دی، ڈھیہ نہ جاوے
اج کل آندے ہین بھچال، دسیں اوہنوں
اوپرے دلوں جے سنے تے فیر، چُپ کر جائیں
جے کر سنیں دھیان دے نال، دسیں اوہنوں
گرمیاں دے دن پہلاں ای مر کے لنگھے
اگوں راتاں رُت سیال، دسیں اوہنوں
