دُعا کریئے
اُداسی دا زمانہ فوت ہو جاوے
دُعا کریئے
خزاواں دی سدا لئی موت ہو جاوے
دُعا کریئے
بہاراں نوں کوئی میلی اکھ نہ ویکھے
دُعا کریئے
کسے وی تھاں، چنگاری ککھ نہ ویکھے
دُعا کریئے
شکاری دا نشانہ فر خطا ہووے
دُعا کریئے
محبت لئی کِتے نہ بد دعا ہووے
دُعا کریئے
کہ راتاں چن چانن نال بھرجاون
دُعا کریئے
کہ پکھو پرت گھر نوں لے کے پرجاون
دُعا کریئے
کہ دنیا تے دعا دی ریت باقی اے
سمے بے آسرے دا
آخری من میت باقی اے
حوالہ: واچھڑ، سلطان کھاروی، بزم مولا شاہ لاہور 2009؛ صفحہ 5 ( ویکھو )
