اکھاں دا صحرا جے ٹھنڈا ہو جاندا
خواباں لئی ٹرنا کجھ سوکھا ہو جاندا
جے فطرت تے ویلے دا رنگ چڑھ سکدا
اج دا سورج وی دو رنگا ہو جاندا
دن دے ساہ کیوں اینے گھٹدے جاندے نیں
فجرے فجرے شاماں ویلا ہو جاندا
اُجڑے رہ تے جے کوئی راہی ٹر پیندا
سکے رکھاں دا سکھ ہولا ہو جاندا
روح تے انج نہ ونھی جاندی دکھاں وچ
جثہ میرا جے نہ تکلا ہو جاندا
محلاں دے بوہے وی تڑکن لگ پیندے
اک سجدہ جے میتھوں پورا ہو جاندا
منزل توڑی اپڑاں بھانویں نہ اپڑاں
زاہد رستہ کجھ تے پدھرا ہو جاندا
