دل نقطہ نور قدم دا ہے

دل نقطہ نور قدم دا ہے
ہک خال جمال صنم دا ہے

جو ہے فرد مکمل کامل
اپنے نقطہ دا ہے واصل
کل توں نیارا، کل توں شامل
عارف لوح قلم دا اے

تھئ جب زائل اشینیت
گئی غیرت تے عینیت
ہے جتھ غیب الغیب ہویت
لاب وجود عدم دا ہے

جس نوں ذوق حضور مہیا
اس نوں جام طہور مہیا
ربط بطون، ظہور مہیا
واسی دیس پرم دا اے

جو دل پاک تھئی اغیاروں
صاف خلص ہوئی خس خاروں
ہے آباد گلوں گلزاروں
ساگی باغ ارم دا اے

مظہر نور ظہور تجلی
مشد قرب دنی فتدلی
مرکز گردش عرش معلی
بے شک دم آدم دا اے

رونق حُسن کمال دی دلڑی
زلف اتے خط خال دی دلڑی
عکس جمال جلال دی دلڑی
برزخ دیر حرم دا اے

دل ادریس مدرس ہر دا
دل لقمان حکیم اندر دا
دل ہے خضر طریق سفر دا
ہر دم ساتھی دم دا اے

جوگی جان فریدی ملت
خلت، عشق، محبت، ملت
بٹھ پئی علم عمل دی علت
آسرا فضل کرم دا اے