کِکلی کلیر دی

کِکلی کلیر دی نی کِکلی کلیر دی
چَھلّاں پئی مار دی جوانی جَٹّی ہِیر دی
کِکلی کلیر دی

چَڑھدی جوانی نال چڑھ گیا بھاء نِی
نَویں نَویں جوبناں دے نَویں نویں چاء نِی
جِندڑی نہ رول دیویں کِسے دلگیر دی
کِکلی کلیر دی
چَھلّاں پئی مار دی جوانی جَٹّی ہِیر دی
کِکلی کلیر دی

جُوڑے وِچ موتیئے دے پُھلّ پَئے سجدے
کنّاں وِچ مِٹھے مِٹھے گِدّھے پئے وجدے
کُھل جاندے بھیت لوک بھانویں لکھ کجدے
پَھٹّی ہوئی ایں توں کِسے ڈاڈھے تِکھے تیر دی
ککلی کلیر دی
چَھلّاں پئی مار دی جوانی جَٹّی ہِیر دی
کِکلی کلیر دی

پَلکاں دی جالی وِچّوں جھاک دیاں کہانیاں
پانیاں تے اگّاں دِیاں کھیڈاں نیں پُرانیاں
راہواں وِچ ٹھیڈے کھان نظراں نمانیاں
تاب نہئیوں جَھلّی جاندی تیرے ڈِنگے چِیر دی
کِکلی کلیر دی
چَھلّاں پئی مار دی جوانی جَٹّی ہِیر دی
کِکلی کلیر دی

چُپ چُپ رہ کے وی ایہہ بڑا کُجھ کہندیاں
لگ جان اکھیاں تے گُجھیاں نہ ریہندیاں
کِدیاں نیں تانگھاں تینوں گھیر گھیر بہندیاں
سچ سچ دس دے نی سونہہ تینوں وِیر دی
کِکلی کلیر دی
چَھلّاں پئی مار دی جوانی جَٹّی ہِیر دی
کِکلی کلیر دی نی کِکلی کلیر دی