سزا

ساڈی دوستی دی لاش
دو دیساں دی سرحد تے
اک ننگا ناچ نچدی پئی
ایس لاش دا سونے ونا پنڈا
سنسر دیاں بھکھیاں نظراں نال ونھیا جا رہیا
ہوا دے وین
ایدھر اودھر کر لارہے
تے کوئی چیک ہوا دے ہونٹھاں توں
تلک تلک پیندی

توں لکھیا سی: میں تہاڈی آپنی
میں لکھیا سی: توں میرا چن
تے دھرم اوہ پالتو جنور
جیہڑا لٹیریاں دے گھر دی راکھی کردا
تے پیار کرن والیاں دے جسماں تے پلدا

ادھا پنجاب
میریاں اکھاں وچ روندا
ادھا پنجاب تیرے ہونٹھاں تے ولکدا
تے ہنجو گیتاں وچ وچر دے
تے گیت ہنجو بن دے
ایہہ خط، اک سزا میرے ان کیتے گناہواں دی
نہیں، ایہہ خط میرا اصلوں نواں گناہ
جیہدی سزا توں بھگت رہی
کہ ساڈے سماج وچ
مرد دے ہر گناہ دی سزا صرف عورت بھگتدی۔۔۔
۱۹۶۹