مڑ دھرتی رو رو آکھدی
تسیں سبھے میرے لال
کیوں لہو دیاں سانجھاں توڑ کے
لائیاں جے غیراں نال
جد بھائیاں باجھ نہ مجلساں
جد یاراں باجھ نہ یار
کیہ سوچ کے توڑے ساک جے
کیوں کھچی نیں تلوار
مونہہ موڑ کھڑا مہینوال وے
لئی مرزے کھچ کمان
اک پاسے ورق گرنتھ دے
اک پاسے پاک قرآن
اجے سوہنی ترسے پیار نوں
اجے ہیراں لک لک رون
کیوں ایڈیاں بھیڑاں پین وے
جے دکھ سکھ سانجھے ہوون
حوالہ: اِک اُدھڑی کتاب دے ورقے؛ سنگ میل پبلی کیشنز