کدھر گیا پوٹھوہار

See this page in :  

کدھر گیا پوٹھوہار او سنگیا، کدھر گیا پوٹھوہار
کدھر گیا پوٹھوہار او سنگیا، کدھر گیا پوٹھوہار

پِنڈا کپنی ٹُکنی پئی اے دُھپاں نی تلوار
کلّا بہہ کے تڑفاں پکے بیہڑے نے بشکار

کدھر گئے اوہ سجرے ویلے اوہ پُھلاں نے ہار
کدھر گئیاں دوستیاں تے کدھر گئے اوہ ڈار

دھرتی تہاڑی سہیلی سی، تے ویلا مہاڑا یار
کدھر گیا پوٹھوہار او سنگیا، کدھر گیا پوٹھوہار

بُوٹے کپ کپ بالن بالیا ہائے ڈِھڈاں نا سیک
جتھے ایہہ گملا اے اوتھے ہونی سی ہک دھریک

پیسے دے کے بٹے آندے گھراں چ چپساں باہیاں
اساں جا جھلّا کون اے جِنھاں مٹی چ دُھپاں راہیاں

کچی مٹی نی خوشبو سوں نوِیں نسل انجان
کِس کی کِس کی دسنے پھرساں اساں علی ارمان

کچی کانساں اُپر ٹنگے لوہے چینی نے بھانڈے
نیندراں نال کی گل کرنے سے اوہ چھتاں دے گاہنڈے

اُچے لمے شینہہ جوان سے جِسراں کہوے نِیاں کڑِیاں
نِکیاں دے قد چھوٹے رہ گئے اوہ مصیبتاں بنیاں

مہاڑے گرائیں وچ آ گئی بجلی، گل تے ایہہ چنگی سی
پر گلیاں توں رُس گئی اوہ جیہڑی رنگا رنگی سی

کچیاں سڑکاں پکیاں ہوئیاں کاراں بھرن فراٹے
کُڑیاں ہُن نئیں پانی اشنیاں ہائے عقلاں نے گھاٹے

سُک گئے گھلے کھوہے اپر ہاسیاں نے شرناٹے
منکر مٹی کسراں پیسن رحمتاں آلے چھاٹے
اساں تے آپنے نائیں اپر مارے آپوں کاٹے

زِویاں بکھو بکھ سیاں پر بنّے تے سانجھے سے
ایہہ دھرتی سی ہیر اساڈی تے اساں رانجھے سے

بِٹ بِٹ ہک دوئے کی تکّاں گلیاں وچوں لنگھنے
آکھ نہ سکنے خیری صلّا شرم بشرمی کھنگنے

خورے کس نے چھوڑی سچیاں دلاں نے وچ پلیار
کدھر گیا پوٹھوہار او سنگیا، کدھر گیا پوٹھوہار

گندلاں تے ساگاں وچ پکنی ہنگاں نی خوشبو
وچ کھوہے نیاں ساوِیاں مرچاں، اکھیاں چ اچھے لو
ماء نے ہتھاں نا ادھ رڑکا نال مکئی نی روٹی
ویلا کیہ کجھ کَھس گِھننا اے اوکو تاڑا لوٹی

جتھے سِرے کی چا کے جُھلنے سے کنکاں نے سٹے
اُتھے جم آئے بجلی نے کھمبے پُتر پِٹے

مسئلا ایہہ اے اس مُلکے بے جوڑ ترقیاں ہوئیاں
اِنھیاں ترقیاں نے نائیں اپر سبھ یھکیاں ہوئیاں

راہنے گاہنے آلیاں زِویاں وچ پئے بنگلے بننے
ہیضیوں مرنیاں شہراں نال گھلوٹے کنگلے بننے

دھرتی کی قیدی کرنے تیں کالے جنگلے بننے
مہاجر بُوٹے لانے نال نہیں موسم رنگلے بننے

مہاڑے گرائیں نی حیاتی کھا گئے شہر نے کُوڑ بپار
کدھر گیا پوٹھوہار او سنگیا، کدھر گیا پوٹھوہار

ویلے نے بیلے وچ مِکی گھلہا تک کے یملا
بُھلیاں کُتھیاں ہڈیں سُتیاں یاداں کیتا حملہ

ڈی ایچ ایس تے بحریہ رل کھاہدا کینٹ تے بملا
زِویاں بیچ بٹا کے وی کدے ہویا اے اُچا شملا

مہاڑی اس گل نا جواب تے دے اوئے نمبردار
کدھر گیا پوٹھوہار او سنگیا، کدھر گیا پوٹھوہار

حوالہ: مٹی دی بُکل؛ سانجھ؛ صفحہ 163

علی ارمان دی ہور شاعری