کدھر گیا پوٹھوہار

کدھر گیا پوٹھوہار او سنگیا کدھر گیا پوٹھوہار
کدھر گیا پوٹھوہار او سنگیا کدھر گیا پوٹھوہار
پِنڈا کپنی ٹُکنی پئی اے دُھپاں نی تلوار
کلّا بہہ کے تڑفاں پکّے بیہڑے نے بشکار
کدھر گئے اوہ سجرے ویلے اوہ پُھلاں نے ہار
کدھر گیاں دوستیاں تے کدھر گئے اوہ ڈار
دھرتی تہاڑی سہیلی سی تے ویلا مہاڑا یار
کدھر گیا پوٹھوہار او سنگیا کدھر گیا پوٹھوہار

بُوٹے کپ کپ بالن بالیا ہائے ڈِھڈاں نا سیک
جتھے ایہہ گملا اے اُتّھے ہونی سی ہِک دھریک
پیسے دے کے بٹّے آندے گھراں چ چِپساں باہیاں
اساں جا جھلّا کون اے جِنھاں مٹی چ دُھپاں راہیاں
کچی مٹی نی خوشبوئی سوں نوِیں نسل انجان
کِس کی کِس کی دسنے پھرساں اساں علی ارمان

کچی کانساں اپر ٹنگے لوہے چینی نے بھانڈے
نیندراں نال کیہ گل کرنے سے اوہ چھتاں نے گاہنڈھے
اُچے لمے شینہہ جوان سے جِسراں کہوَے نِیاں کڑِیاں
نِکیاں نے قد چھوٹے رہ گئے اوہ مصیبتاں بنیاں
مہاڑے گرائیں وچ آ گئی بجلی گل تے ایہہ چنگی سی
پر گلیاں توں رُس گئی اوہ جیہڑی رنگا رنگی سی
کچِیاں سڑکاں پکِیاں ہوئیاں کاراں بھرن فراٹے
ہُن کِس نے نل گوشے باسن میریاں نے سناٹے
کُڑیاں ہُن نئیں پانی اشنیاں ہائے عقلاں نے گھاٹے

سُک گئے گھلے کھوہے اپر ہاسیاں نے شرناٹے
منکر مٹی کِسراں پیسن رحمتاں آلے چھاٹے
اساں تے آپنے نائیں اپر مارے آپوں کاٹے
زِویاں بکھو بکھ سِیّاں پر بنّے تے سانجھے سے
ایہہ دھرتی سی ہیر اساڈی تے اساں رانجھے سے
بِٹ بِٹ ہک دُوئے کی تکّاں گلیاں وچوں لنگھنے
آکھ نہ سکنے خیری صلّا شرم بشرمی کھنگنے
خورے کس دے چھوڑی سچیاں دِلاں نے وچ پَلیار
کدھر گیا پوٹھوہار او سنگیا، کدھر گیا پوٹھوہار

شام پوے تے گراواں وچ بھخنے سے نور تندور
دِھیاں بھیناں روٹیاں لانِیاں بیٹھیاں پُور و پُور
ہک بہہ کے پئی پیڑے کرنی دُوئی بہہ کے پئی چھنڈے
جینے نا دُکھ ہولا وَے جے بندہ اس کی بنڈَے
اکلاپا اوہ جُتّی جیہڑی ساری عُمراں ہنڈھَے
میداں نے پیراں وچ پئیاں اڑیل چَنڈھیاں چنڈھے
بندہ ساری عُمراں پھٹے لمّے پینڈے گھنڈے
ویلا ہک کھڈیا جواری ڈبی چ چِھکے چھنڈے

جھلے مہاتڑ بندیاں کولوں سانہہ نے سِکّے پھنڈے
چنگی یاد اے اوہ دراٹی جس کی ویلا چنڈے
بھرے گھَرے سوں سُنج مسنجے بیلے تک جا نکلی
گل ہونی سی روٹیاں آلی ویلے تک جا نکلی
باوے ہُراں تیں موٹی لغنی نکے ماریوں گوگی
گھَرے نے گھیونل چوپڑی گچھے ڈھول سپاہیے جوگی
روٹیاں لاہ کے ماوراں لاہنیاں نکیا تائیں گھروڑ
اُس ذائقے کی لوڑ نَے آسطے ویلیا پِچھے دوڑ
جنتاں تک گشنی سی جِنھاں روٹیاں نی خشبو
آ اُنھاں کی رل کے روئیے سنگیا نیڑے ہو
متھے اپر لاٹاں مارنا پورے سچ نا نور
آٹے وچوں کڈھنے نہیں سے خالص لوک چھلُور
باڑِیاں بکِیاں تے فصلاں وچ پَے گئے لوہے نے سُور
ڈرائنگ روماں وچ ٹنگیاں رہ گئیاں رنگین چنگیراں
کھا کے وی ہُن بھکھ نہیں گشنی ہتھ ڈِھڈاں تے پھیراں
خورے کدھر گئے گرولنے اگُو نے تارے نپنے
اگّاں نی لمباں نے چاقو چِٹیاں باہواں کپنے

مہاڑے ہڈّاں وچ پوٹھوار نے ٹِبّے ڈَھکیاں وسنے
میں تَے اس کی بُھل گچھاں کُجھ لوک ایویں پئے بکنے
ربّا پُچھنا چاہیے آں پر پُچھنوں پئے آں جھکنے
پیار محبتاں آلے اوہ ویلے ہُن مُڑ نہیں سکنے
سُنی شیعے سبھے رل کے نام علی نا جپنے
نہ ایہہ فرقہ بازی سی نہ ذاتاں نے رولے سے
اوہ بندے وی خوش سے جیہڑے تقدیروں ہولے سے
ہُن ہک چُپ چویتے گھلے بوہڑے تھلے ہار
اتھرو پینے ہوکے کھانے بیٹھے آں ابزار
کدھر گیا پوٹھوار او سنگیا کدھر گیا پوٹھوہار

گندلاں تے ساگاں وچ پکنی ہِنگاں نی خوشبو
وچ کھوہے نِیاں ساوِیاں مرچاں، اکھیاں چ اچھے لو
ماء نے ہتھاں نا ادھ رِڑکا نال مکئی نی روٹی
ویلا کَیہ کُجھ کَھس گِھننا اے اُوکو تاڑا لَوٹی
جتھے سِرے کی چا کے جُھلنے سے کنکاں نے سِٹّے
اُتھے جم آئے بجلی نے کھمبے پُتر پِٹے
مَسلا ایہہ اے اس مُلکے بے جوڑ ترقیاں ہوئیاں

اِنھاں ترقیاں نے نائیں اپر سبھ یھکیاں ہوئیاں
راہنے گاہنے آلیاں زِویاں وچ پئے بنگلے بننے
ہیضیوں مرنَیاں شہراں نال گھلوٹے کنگلے بننے
دھرتی کی قیدی کرنے تِیں کالے جنگلے بننے
مہاجر بُوٹے لانے نل نہیں موسم رنگلے بننے
مہاڑے گرائیں نی حیاتی کھا گئے شہر نے کُوڑ بپار
کدھر گیا پوٹھوہار او سنگیا، کدھر گیا پوٹھوہار

مُکنے مُکنے مُکی گئے چیتر بیساکھ نے میلے
دانداں نِیاں لکیراں تائیں پدھرے ہونے بیلے
پِیراں نَیاں مزاراں اپر رنگ برنگے ٹھیلے
بنیاں اپر بہہ کے کھیڈنے تاشاں چوسر بیلھے
تنبواں وچ دُکاناں بیچن رنگ برنگیاں بنگاں
میں سجناں کی یاد کراں تے اُس پاسوں نہ لنگھاں
کالے شاہ کڑاہے وچ پئی بننی چِٹی جلیبی
پُھوکاں مارنی کَنّاں وچ دُنیا شیطان فریبی
دُنیا کی رُوڑے وچ سٹ کے تک دِلے نا میلہ
ایہہ میلہ اُس نا اے جس نی جیباں چ نہیں ہک دھیلا

ویلے نے بیلے وچ مِکی گھلہا تک کے یملا
بُھلیاں کُتھیاں ہڈِیں سُتیاں یاداں کیتا حملہ
ڈی ایچ ایس تے بحریہ رل کھاہدا کینٹ تے بملا
زِویاں بیچ بٹا کے وی کدے ہویا اے اُچا شملا
مہاڑی اس گل نا جواب تے دے اوئے نمبردار!
کدھر گیا پوٹھوہار او سنگیا کدھر گیا پوٹھوہار
کدھر گیا پوٹھوہار او سنگیا کدھر گیا پوٹھوہار