ساڈا رزق اداس

اسیں ہاں پکھی واس وے لوکا
ساڈا رزق اُداس
ٹُر ٹُر مر مر پینڈے بھوراں
ساڑ کے اپنا ماس
ساڈا رزق اداس

وا ورولیاں دے نال بدھی
ساڈی آس نراس
ساڈا رزق اُداس

دُھوڑاں کھا کے دُھپاں پی کے
بُجھے ساڈی پیاس
ساڈا رزق اُداس

تن دا تمبو لاندے پُٹدے
روح تے پے گئی لاس
ساڈا رزق اُداس

ساڈا ربّ اے ریتڑ پَینڈا
اسیں تھلّاں دے داس
ساڈا رزق اُداس

پِچھے لگیّاں موئِیاں سدھراں
اگّے نسّے آس
ساڈا رزق اُداس

بہے بیلیاں اندر لبھیے
سجرے پُھل دی باس
ساڈا رزق اُداس

چھان نتار یے تتی لوری
ساہواں دا سنیاس
ساڈا رزق اُداس

جندڑی ورہدے جھڑ دی ووہٹی
موت دی بھین بھڑاس
ساڈا رزق اُداس

تن دی چاٹی دُھپ دے جھولے
لسّی وِچ کٹھاس
ساڈا رزق اداس

سُتھرا چانن پِیوَن چلے
چُک مٹی دی ٹاس
ساڈا رزق اُداس

سبق سلُوک دا مرشد دِتا
عاماں دے وچ عام کہایئے
خاصاں دے وچ خاص
ساڈا رزق اُداس وے لوکا
اسیں ہاں پکھی واس