مڈل کلاس

مٹی دی واشنا توں ڈرے ہوئے شہر وچ
تُوں اپنے جُثّے تے چائنا دے پرفیوم لا کے
اپنیاں اندرون شہر توں خریدیاں ہوئیاں سدھراں نوں
اُچّے برانڈ دے عزتاں والے مومی لفافے وچ پاء کے
کسے ہور نوں آپنے آپ تے ولیٹ کے
بڑیاں بڑیاں سٹوراں تے وِنڈو شاپنگ کر دی ایں
تے نِیویں نِیویں ہوّکے بھر دی ایں
کدھرے کوئی سُن نہ لوے
پر ہوا تاں سبھ کجھ سُندی ہے
بھاوِیں پوہلی دے ہون یا گلاب دے
ہوا تے سارے پُھل چندی ہے
جندڑیے بول
میری کافی وچ چینی نہ گھول

تُو ں وی اِس اُچے سٹور تے کوڑ دی اُچی اڈّی لا کے
اپنے آپ نوں اپنی کلاس توں ودھ شوکر دی ہوئی
کسے کڑی دی شوء شاء تے نہیں
چل کسے تھڑے تے بہہ کے چاہ پیندے آں
اپنے سچ وچ جیندے آں