کیہڑے پاسے جاواں

جیہڑے ویلے گھنٹی میرے
دَروازے دی کھَڑکی
اوسے وقت اَلارم والی
گھڑی دَھڑا دَھڑ دَھڑکی
اُتّو ڑُتّی فون مرے دی
نبض اَچانک پَھڑکی
اُبّھڑواہے ٹی وی دے وِچ
ڈِسکو دی اَگ بَھڑکی
سِر توں فیر جہاز اِک لنگھیا
دِل دی کوٹھی دَھڑکی
اَچّن چیت اِک ہارن گجّیا
ہور اِک بجلی کَڑکی
اِنج بریک کریچی کوئی
ریت رَگاں وِچ رَڑکی
کَھردے وِچ وی شور شرابا
رَولا سَڑکو سَڑکی

کُوکاں مَینوں گھیر لیا مَیں کیہڑے پاسے جاواں
انور ایس سمے دے ہتّھوں کَنّاں نُوں ہَتھ لاواں