کیتی دھکیاں نال دیہاڑی پوری منگی اے
قرضہ تاں نہیں منگیا میں مزدوری منگی اے
سچا عاشق بݨ نہیں سگیا دے کے گَل دی رَت
بدلے دیوچہ جہیں دیدار دی چُوری منگی اے
کلیاں تیری اکھ توں سِکھیا وَل شرماوݨ دا
پھُلاں تیرے ہوٹھاں توں مغروری منگی اے
اللّٰہ پوری کر دِتی اے دل دی ہر منشاء
آپوں جاݨے میں خیرات ادھوری منگی اے
تیرے مُکھ توں سوجھلا منگیا بھاگاں بھری سویر
تیریاں زلفاں توں خشبو کستوری منگی اے
ہتھاں نال جہان دی دولت ونڈی مست فقیر
اپݨے کاݨ ہمیشاں تاہنگ حضوری منگی اے
ساری زندگی یاری رکھی اپݨے رنگیاں نال
عاقب" آپوں ڈاڈھیاں کولوں دوری منگی اے
