بے ہمتے نے جیہڑے بہہ کے شکوہ کرن مقدراں دا
اُگن والے اگّ پیندے نے سینہ پاڑ کے پتھراں دا
منزل دے متھے دے اُتے تختی لگدی اوہناں دی
جیہڑے گھروں بنا کے ٹردے نقشہ اپنے سفراں دا
سُولی تے منصور نوں ٹنگدے کدی وی نہ بے علمے لوگ
جے کوئی شہر دا دانا دِسدا مطلب اوہدے اکھراں دا
تھاؤں تھائیں جے ہو جائیے عادی فرض نبھاون دے
کدے نہ کرئیے اک دُوجے دے اگّے ٹھوٹھا سدّھراں دا
تیرے شہر چ بابا نجمی کسے وی سِر نوں کجیا نئیں
ایتھے کِسراں ہوکا لاواں بُرقعیاں دا تے چدّراں دا
حوالہ: اکھراں وچ سمندر؛ صفحہ 63 ( ویکھو )
