میری اگّ دے اتے اپنی پا کے اگّ
کدھر چلے بھامبڑ بنا کے میری اگّ
دیوے نال نئیں جانا ایس ہنیرے نے
رکھ تلی تے اپنے دل نوں لا کے اگّ
ایہدے ورگی دوزخ دی وی ہونی نئیں
چلے جیہڑی ایتھے اسیں ہنڈھا کے اگّ
بلے نالوں ہتھ اگیرے جاواں گا
جد میں نچیا اپنے پیریں پا کے اگّ
قبلہ سِدھا کر لو اپنا چودھریو
جنتا نکل پوے نہ کدھرے کھا کے اگّ
دتی ڈھلّ تے تیرے امبر ساڑے گی
رکھی جیہڑی سینے وچ دبا کے اگّ
کھیڑے جیہڑی بالی مینوں ساڑن لئی
پرتاں گا میں ونجھلی نال بجھا کے اگّ
میں کی بابا نجمی تیرے چُلھے دی
روز بھراواں وی نہیں بالنی آ کے اگّ
