اوہدی یاد چہ اکھ بھر آوے کیسی گل اے
جیہدے ہوندیاں دل گھبراوے کیسی گل اے
جنہوں علم اے ہر اک گل دا ہر اک گل دا
اوہدی سمجھے کچھ نہ آوے کیسی گل اے
سُکھ نوں اپنے نال بٹھا کے سجے پاسے
بندہ دُکھ دا حال سناوے کیسی گل اے
کوئی نئیں سُن دا حال غریب دا اس دنیا تے
جناں مرضی رؤلا پاوے کیسی گل اے
اوہدے لئی تے کجھ نئیں لکھیا کسے نے اج تک
جین دی خاطر جو مر جاوے کیسی گل اے
جیہڑا بندہ کجھ نہ ہووے اوہو بندہ
اُچا اپنا نام سداوے کیسی گل اے
اوہدے اُتے ہرکھ نئیں آؤندا بشری جیہڑا
گل گل اُتے لارے لاوے، کیسی گل اے
