مالی ہن بریاں رسماں دے ورتارے تُوں بدل ضرور بدل
ویلے نے جے رتّ بدلی اے توں باغ دے چا دستور بدل
آہراں دیاں نویاں چالاں نے میدان عمل دے بدلے نے
توں سوچاں دی چا نظر بدل سوچاں دا فکر شعور بدل
نہیں یار ملاہوا دور کوئی پیندا اے بھلیکھا نظراں دا
دے بیڑا ٹھیل توکل تے پر بیڑے والے پور بدل
لبھّ کاریگر توں نویں کتوں پئے پیش نے جے کر ہنر نویں
محنت دے ڈھنگ جے بدلے نے، توں ڈھنگ دے لے مزدور بدل
دنیا اے عشقَ محبت دی منن نوں حق اک عاشق دا
بدلی اے جے سولی عقلاں نے توں وی جھلے منصور بدل
جس نے ہے متی مدت دی ماری بے سُرتا سرت تیری
لے پکڑ صراحی بھنّ پراں کر جام ایہہ چکنا چور بدل
