وسیا نہ شہر تیرا ہو کے ویرانہ خراب
ہویا نہ آباد تیرے بعد دل خانہ خراب
فجر تیکر شمع نے بالی اوہدی مٹی اخیر
شام تک ہویا شمع دے مگر پروانہ خراب
کیتی اے ساقی دی بے سرتی نے بدنامی بڑی
رہِ کے میخانے چ ہویا رند مستانہ خراب
ہون نہ وچ محفلیں میرے اوہناں دے تذکرے
داستان اوہناں دی چنگی میرا افسانہ خراب
وچ ہنیرے رخ غماں دی رات دا لشکے کویں
زلف دی بہتی پریشانی تے کجھ شانہ خراب
کرن کیکن لوک ہن یاراں دی یاری دا گلہ
ہو گیا اے اپنے وانگر ہی بیگانہ خراب
مینوں اوہناں دی نظر دے شوخ تحفے ماریا
کر گیا اوہناں نوں میرے دل دا نذرانہ خراب
وچ ویرانے ایس دی گزران سی چنگی بھلی
آ کے تیرے شہر ہویا تیرا دیوانہ خراب
بت خراب ہو کے خدا بن جان نہ کدھرے فقیر
بن گیا خانہ خدا دا ہو کے بت خانہ خراب
