سُنیا سی میں زخم دِلاں دے

سُنیا سی میں زخم دِلاں دے، نال محبت بھر جاندے نیں
اک مُسکان مِلے تاں، ڈُبدے، پتھرـ چِت وی تر جاندے نیں

اِک ادھ رِشم اُدھاری دے دے، اِس نوں میں ہتھیار بناواں،
کالک دے ونجارے نھیرے، جگنو توں وی ڈر جاندے نیں

کجھ ساہواں دی سانجھی دھڑکن، زندگی ہے رنگاں دا میلہ
بے قدرے، کُجھ لوک پتہ نہیں، کیوں بدرنگی کر جاندے نیں

مہنگی وست پیار دی پُونجی، مُفت مِلن تے جو نہ مانن،
زندگی دی رن بھومی وِچ اوہ، جِتی بازی ہر جاندے نیں

باز بھرے پرواز کدے نہ، دانہ دُنکا کھان دی خاطر
انبر پار کرن لئی اوس نوں، لے کے ہمتی پر جاندے نیں

میرے تیرے ورگے سارے، ان دے کیڑے جان نہ سکدے،
بابا دیپ سِنہ دے ہانی، سیس تلی کِنج دھر جاندے نیں

دو واری اِک سال چ تکیئے، آزادی دا نوری مکھڑا،
باقی تِن سو تریٹھ دِہاڑے، بدل پردہ کر جاندے نیں