اک دُوجے لئی یار ہنورے رہ گئے نے
یا پھر ہتھاں دے وچ ہورے رہ گئے نے
پنڈ میرے دی ساری پرھیا مر گئی اے
مُونہہ وچ گلاں نے ہنگھورے رہ گئے نے
آس بڑی سی خشحالی نوں ویکھاں گے
ساڈے سارے خاب ادُھورے رہ گئے نے
کوئل دی کُو دسو کتھوں آوے گی
باغاں دے وچ نمّ دھتورے رہ گئے نے
اک مُرلی اک ڈمرو اک مداری اے
باقی کی اے صرف جمورے رہ گئے نے
کسے نا کھولھیا دوڑ کے چھیتی بُوہے نوں
وجدے گلیاں وچ کھنگورے رہ گئے نے
سجن بیلی سارے چھڈّ کے تُر گئے نے
ہن بسّ دشمن میرے مورے رہ گئے نے
تکڑے میرے دیس نوں لُٹّ کے لے گئے نے
ارشد لیکھاں دے وچ جھورے رہ گئے نے
