پِنڈاں دی اے رِیت وی اوہیو
دوہڑے ماہیے گیت وی اوہیو
قسمے پیار پریت وی اوہیو
اویں ای نیں دِلاں دے اندر
روز مِلن دے چاء
اِک واری تے آ
وے سجنا
اِک واری تے آ
صُبح شام دُپہراں اوہیو
چھلاں کنڈھے لہراں اوہیو
نِکیاں وڈیاں نہراں اوہیو
اویں ای اجے وگدے پئے نیں
ساڈے پنج دریا
اِک واری تے آ
وے سجنا
اِک واری تے آ
گلاں اوہیو، باتاں اوہیو
چن چاننیاں راتاں اوہیو
بدل تے برساتاں اوہیو
اویں ای اجے گُھلدی پئی اے
ٹھنڈی ٹھنڈی واء
اک واری تے آ
وے سجنا
اِک واری تے آ
اِک دوجے دی لوڑ وی اویں
وٹاں بنے موڑ وی اویں
پپل ٹالھی بوڑھ وی اویں
اویں ای اے لوکاں دے وچ
اج وی پیار وفا
اِک واری تے آ
وے سجنا
اِک واری تے آ
گلیاں اویں،راہ وی اویں
ہسدی کنک کپاہ وی اویں
گھر گھر پکدی چاہ وی اویں
اویں ای نیں بہندے سارے
اِک تھاں اگ بھخا
اِک واری تے آ
وے سجنا
اِک واری تے آ
پِنیاں کھنڈ پتاسے اویں
خُشیاں پیار دلاسے اویں
دویں نین پیاسے اویں
سندھو تیری راہ تے بیٹھے
اج وی آساں لا
اِک واری تے آ
وے سجنا
اِک واری تے آ
